ਨਗਰ ਨਿਗਮ ਦੀ ਡਿਫਾਲਟਰਾਂ ਵਿਰੁੱਧ ਮੁਹਿੰਮ ਤੇਜ- ਵਰਮਾ 2 ਦਿਨ ਅੰਦਰ 20 ਲੱਖ ਦੀ ਰਿਕਵਰੀ ਲੋਕਾਂ ਨੂੰ 31 ਮਾਰਚ ਤੱਕ ਬਕਾਇਆ ਟੈਕਸ ਜਮਾਂ ਕਰਵਾਉਣ ਦੀ ਅਪੀਲ

ਫਗਵਾੜਾ 26 ਮਾਰਚ (ਧਰੁਵ ਕਲੂਚਾ)  ਨਗਰ ਨਿਗਮ ਫਗਵਾੜਾ ਦੇ ਕਮਿਸ਼ਨਰ ਸ਼੍ਰੀ ਰਾਜੀਵ ਵਰਮਾ ਵੱਲੋਂ ਕੰਮ ਵਿੱਚ ਤੇਜ਼-ਤਰਾਰ ਰਵੱਈਏ ਅਨੁਸਾਰ ਫਗਵਾੜਾ ਸ਼ਹਿਰ ਦੇ ਪ੍ਰਾਪਰਟੀ ਟੈਕਸ ਡਿਫਾਲਟਰਾਂ ਵਿਰੁੱਧ ਚਲਾਈ ਜਾ ਰਹੀ ਮੁਹਿੰਮ ਦੇ ਸਦਕਾ ਨਗਰ ਨਿਗਮ ਫਗਵਾੜਾ ਨੂੰ ਬੀਤੇ 2 ਦਿਨਾਂ ਦੇ ਅੰਦਰ-ਅੰਦਰ 20 ਲੱਖ ਰੁਪਏ ਦੀ ਰਿਕਵਰੀ ਹੋਈ ਹੈ।
ਸ਼੍ਰੀ ਵਰਮਾ ਵੱਲੋਂ ਅੱਜ ਮੁੜ ਪ੍ਰਾਪਰਟੀ ਟੈਕਸ ਸ਼ਾਖਾ ਦੇ ਅਧਿਕਾਰੀਆਂ ਨਾਲ ਮੀਟਿੰਗ ਕਰਕੇ ਸਖਤ ਆਦੇਸ਼ ਦਿੱਤੇ ਕਿ ਹੋਰ ਵੀ ਪ੍ਰਾਪਰਟੀ ਧਾਰਕ, ਜੋ ਨਗਰ ਨਿਗਮ ਦੇ ਪ੍ਰਾਪਰਟੀ ਟੈਕਸ ਡਿਫਾਲਟਰ ਹਨ, ਦੀਆਂ ਪ੍ਰਾਪਰਟੀਜ਼ ਨੂੰ ਤੁਰੰਤ ਸੀਲ ਕਰ ਦਿੱਤਾ ਜਾਵੇ ਅਤੇ ਸਾਰੇ ਬਕਾਇਆ ਜਮ੍ਹਾਂ ਕਰਵਾਉਣ ਉਪਰੰਤ ਹੀ ਪ੍ਰਾਪਰਟੀਜ਼ ਦੀ ਸੀਲ ਓਪਨ ਕੀਤੀ ਜਾਵੇ। 
ਸ਼੍ਰੀ ਵਰਮਾ ਨੇ ਸ਼ਹਿਰ ਵਾਸੀਆਂ ਨੂੰ ਇੱਕ ਵਾਰ ਫਿਰ ਅਪੀਲ ਕੀਤੀ ਕਿ ਫਗਵਾੜਾ ਸ਼ਹਿਰ ਦੇ ਵਿਕਾਸ ਲਈ ਸ਼ਹਿਰ ਵਾਸੀ ਆਪਣਾ ਪ੍ਰਾਪਰਟੀ ਟੈਕਸ 31 ਮਾਰਚ 2021 ਤੋਂ ਪਹਿਲਾਂ-ਪਹਿਲਾਂ ਜਮ੍ਹਾਂ ਕਰਵਾਉਣ। 
ਸ਼ਹਿਰ ਵਾਸੀਆਂ ਨੂੰ ਪ੍ਰਾਪਰਟੀ ਟੈਕਸ ਜਮ੍ਹਾਂ ਕਰਵਾਉਣ ਦੀ ਸਹੂਲਤ ਲਈ ਨਗਰ ਨਿਗਮ ਫਗਵਾੜਾ ਦੀ ਟੈਕਸ ਸ਼ਾਖਾ ਦਾ ਦਫਤਰ ਮਿਤੀ 31 ਮਾਰਚ 2021 ਤੱਕ ਸਮੇਤ ਸ਼ਨੀਵਾਰ, ਐਤਵਾਰ ਅਤੇ ਹੋਲੀ ਦੀ ਸਰਕਾਰੀ ਛੁੱਟੀ ਵਾਲੇ ਦਿਨ ਵੀ ਆਮ ਪਬਲਿਕ ਲਈ ਸਵੇਰੇ 09:00 ਵਜੇ ਤੋਂ ਸ਼ਾਮ 05:00 ਵਜੇ ਤੱਕ ਖੁੱਲ੍ਹਾ ਰਹੇਗਾ।