‘ਆਪ’ ਦੀਆਂ ਗਰੰਟੀਆਂ ਤੇ ਯਕੀਨ ਕਰਕੇ ਪੰਜਾਬ ਵਾਲੀ ਗਲਤੀ ਹਿਮਾਚਲ ਤੇ ਗੁਜਰਾਤ ਨਾ ਦੁਹਰਾਉਣ - ਲੱਕੀ ਸਰਵਟਾ * ਕਿਹਾ 350 ਕਰੋੜ ਦੀ ਗੱਡੀ ਤੋਂ ਪਹਿਲਾਂ ਗਰੰਟੀਆਂ ਤਾਂ ਪੂਰੀਆਂ ਕਰੇ ਸਰਕਾਰ

ਫਗਵਾੜਾ 30 ਅਗਸਤ (ਧਰੁਵ ਕਲੂਚਾ) ਭਾਜਪਾ ਐਸ.ਸੀ. ਮੋਰਚਾ ਜਿਲ੍ਹਾ ਕਪੂਰਥਲਾ ਦੇ ਜਨਰਲ ਸਕੱਤਰ ਲੱਕੀ ਸਰਵਟਾ ਨੇ ਹਿਮਾਚਲ ਪ੍ਰਦੇਸ਼ ਅਤੇ ਗੁਜਰਾਤ ਦੇ ਵੋਟਰਾਂ ਨੂੰ ਸਚੇਤ ਕੀਤਾ ਹੈ ਕਿ ਆਮ ਆਦਮੀ ਪਾਰਟੀ ਦੀਆਂ ਝੂਠੀਆਂ ਗਰੰਟੀਆਂ ਤੇ ਯਕੀਨ ਕਰਕੇ ਪੰਜਾਬੀਆਂ ਵਲੋਂ ਕੀਤੀ ਗਲਤੀ ਨਾ ਦੁਹਰਾਉਣ ਨਹੀਂ ਤਾਂ ਅਗਲੇ ਪੰਜ ਸਾਲ ਪਛਤਾਵੇ ਤੋਂ ਸਿਵਾ ਕੁੱਝ ਵੀ ਹੱਥ ਨਹੀਂ ਲੱਗੇਗਾ। ਅੱਜ ਇੱਥੇ ਗੱਲਬਾਤ ਦੌਰਾਨ ਉਹਨਾਂ ਮੁੱਖ ਮੰਤਰੀ ਭਗਵੰਤ ਮਾਨ ਵਲੋਂ 350 ਕਰੋੜ ਰੁਪਏ ਦੀ ਮਾਲ ਗੱਡੀ ਖਰੀਦਣ ਸਬੰਧੀ ਬੀਤੇ ਦਿਨੀਂ ਦਿੱਤੇ ਬਿਆਨ ਨੂੰ ਹਾਸੋਹੀਣਾ ਕਰਾਰ ਦਿੱਤਾ ਅਤੇ ਕਿਹਾ ਕਿ 18+ ਉਮਰ ਦੀਆਂ ਔਰਤਾਂ ਨੂੰ ਇਕ ਹਜਾਰ ਰੁਪਏ ਪ੍ਰਤੀ ਮਹੀਨਾ ਦੇਣ ਦਾ ਚੋਣਾਂ ਸਮੇਂ ਕੀਤਾ ਵਾਅਦੇ ਤੋਂ ਤਾਂ ਭਗਵੰਤ ਮਾਨ ਸਰਕਾਰ ਇਹ ਕਹਿ ਕੇ ਮੁਕਰ ਗਈ ਕਿ ਖਜਾਨਾ ਖਾਲੀ ਹੈ। ਫਿਰ ਹੁਣ ਆਪ ਸਰਕਾਰ ਸਾਢੇ ਤਿੰਨ ਸੌ ਕਰੋੜ ਦੀ ਮਾਲ ਗੱਡੀ ਕਿੱਥੋਂ ਖਰੀਦੇਗੀ? ਉਹਨਾਂ ਕਿਹਾ ਕਿ ਅਜਿਹੇ ਬੇਸਿਰ ਪੈਰ ਦੇ ਐਲਾਨ ਸਿਰਫ ਹਿਮਾਚਲ ਪ੍ਰਦੇਸ਼ ਅਤੇ ਗੁਜਰਾਤ ਦੀਆਂ ਵਿਧਾਨਸਭਾ ਚੋਣਾਂ ਨੂੰ ਮੁੱਖ ਰੱਖ ਕੇ ਉੱਥੋਂ ਦੀ ਜਨਤਾ ਨੂੰ ਭਰਮਾਉਣ ਲਈ ਕੀਤੇ ਜਾ ਰਹੇ ਹਨ। ਕੇਜਰੀਵਾਲ ਹਰ ਮਹੀਨੇ ਗੁਜਰਾਤ ਜਾ ਕੇ ਇਕ ਨਵੀਂ ਗਰੰਟੀ ਦਾ ਐਲਾਨ ਕਰ ਰਹੇ ਹਨ, ਜਿਵੇਂ ਪੰਜਾਬ, ਗੋਆ ਤੇ ਉਤਰਾਖੰਡ ਦੀਆਂ ਚੋਣਾਂ ਸਮੇਂ ਕੀਤੇ ਸੀ। ਗੋਆ ਤੇ ਉਤਰਾਖੰਡ ਦੇ ਵੋਟਰ ਨੇ ਤਾਂ ਇਹਨਾਂ ਨੂੰ ਮੂੰਹ ਨਹੀਂ ਲਗਾਇਆ ਪਰ ਪੰਜਾਬੀਆਂ ਨੇ ਭਾਵੁਕਤਾ ‘ਚ ਕੇਜਰੀਵਾਲ ‘ਤੇ ਭਰੋਸਾ ਕਰ ਲਿਆ ਜਿਸਦਾ ਨਤੀਜਾ ਇਹ ਹੈ ਕਿ ਸੂਬੇ ‘ਚ ਆਪ ਸਰਕਾਰ ਬਣਨ ਦੇ ਤੁਰੰਤ ਬਾਅਦ ਸੰਗਰੂਰ ਲੋਕਸਭਾ ਹਲਕਾ ਜੋ ਕਿ ਮੁੱਖ ਮੰਤਰੀ ਦਾ ਆਪਣਾ ਹਲਕਾ ਹੈ, ਇੱਥੇ ਆਪ ਪਾਰਟੀ ਨੂੰ ਕਰਾਰੀ ਹਾਰ ਦਾ ਸਾਹਮਣਾ ਕਰਨਾ ਪਿਆ ਕਿਉਂਕਿ ਲੋਕਾਂ ਨੂੰ ਪਤਾ ਲੱਗ ਗਿਆ ਕਿ ਆਪ ਪਾਰਟੀ ਵਲੋਂ ਵਿਧਾਨਸਭਾ ਚੋਣਾਂ ਤੋ ਪਹਿਲਾਂ ਉਹਨਾਂ ਨੂੰ ਗਰੰਟੀਆਂ ਦੇ ਸਿਰਫ ਝੂਠੇ ਸਬਜਬਾਗ ਦਿਖਾਏ ਗਏ ਸੀ।